Üzümü çevirim tanrıya sarı
Mən baxım səmaya,O mənə baxsın
Qəzəbdən qışqırım bağırım yenə
O da cavab versin, ildırım çaxsın
Elə düz önümdə çırpılsın yerə
Onun qəzəbindən qopan qığılcım
yansın alovlansın, qoy hər tərəfim
Sonra dayanmadan bir yağış yağsın
axsın,
axsın şırım-şırım hər tərəfimdən
batırsın məni qoy o göz yaşında
çay kimi dolansın bütün dünyanı
kimsəsiz sahildə atsın kənara
lap elə dünyanın o bir başında...
Ayılım üz gözüm qanın içində...
Hələ soyumamış hirsi, qəzəbi
bir az da vuruşum çarpışım hələ
çıxarım içimdən hissi, qəzəbi
zamanın özüylə yarışım hələ...
üzümü çevirim tanrıya sarı
Mən baxım səmaya O mənə baxsın
Mən gülüm, cavabı günəşlə versin
Günəşlə nur olsun ruhuma axsın...
