Vağzalı çalınır, vağzalı yenə,
Sevən ürəklərin günüdür bu gün.
Kaş bütün evlərin qapısın döysün,
Xalqımın adəti bu toy, bu düyün. 

Bir "Segah" çalınır sevgi dəmində,
Yanan ürəklərin soyutmaq üçün.
Kimlərsə düşərək sözün sehrinə,
Can atır gəncliyə qayıtmaq üçün. 

Seyiddən, Vahiddən qəzəllər gəlir,
Ruhumuz dincəlir öz aləmində.
Əyləşib məclisdə söz sərrafları,
Gəzir xəyalları söz aləmində.