Ürəkdə hər bir sözün öz yeri, ünvanı var,

Doğru sözün alqışı, əyri sözün qanı var.

Kim deyir ki, yox canı,  bir quruca sözdü söz?

Sözün şair dilində nəfəsi var, canı var.

Söz ilə aşkar edim aləmə öz eşqimi,

Eşqə düşən aşiqin dərdinin dərmanı var.

Meydan edə bilmərəm qəlbimi hər canana,

Əsil doğru aşiqin təkcə bir cananı var.

Hər qəlbdə var O canan, onsuz hədər ömrümüz,

Salamlar olsun Ona, gör neçə heyranı var.

Çoxdu qəzəl ustadı Nizamilərdən bəri,

Dünən Vahidi olmuş, bu gün də Ümmanı var.