Xəyalın ilə, gülüm, seyri-gülüstan oluram,

Gahi şadiman olub, gahi də nalan oluram.

Sevgimin şövqü mənim ruhumu tilsimə salıb,

Yusifi-eşqəm hər an mən əhli-zindan oluram.

Sanma azadə məni, varlığının sayəsiyəm,

Sən olan yerləri bir-bir gəzib mehman oluram.

"Təki sən bircə dəfə gəl məni yad eylə" - deyə,

Həmi ruh, həm də ki cismim ilə qurban oluram.

Bu da bir fəxri-fəxarətdi ki, Cinan, bunu bil,

Eşqi-dildar ilə mən dillərə dastan oluram.