Bilməm nə səbəbdir, bizə dövran da yad oldu.
Düşman kəsilib hər məqam, hər an da yad oldu.

Verdinsə dəyər, bildirərək söyləmə: - "cansan"
Bir də görəcəksən sənə o "can" da yad oldu.

Bizlər unudur insanı, insanlığı, hətta
Diqqət ilə bax, insana insan da yad oldu.

Doğma deyilənlər yada çevrildi sonunda,
Doğmalığı əks etdirən o qan da yad oldu.

Şeytanlıq edib şeytana lənət oxumaqdan,
Yoxdur dəxi şeytan, bizə şeytan da yad oldu.

Mən yarə görə səbr edib hər dərdə dözürdüm,
Tərk etdi məni sevgili canan da yad oldu.

Sən dünyanı dərk et, o həqiqət gözü ilə,
Vədə yetişəndə demə Cinan da yad oldu.