Gedirəm sevgili canan, daha yalvarma mənə!

Eyləmə bağrımı al-qan, daha yalvarma mənə!

***

Mən sənin səri-kuyində dolanıb eşq dilədim,

Vermədin sən mənə imkan, daha yalvarma mənə!

 ***

Əğyara meyl elədinsə, geriyə yoxdu yolun!

Olsan da min kərə peşman, daha yalvarma mənə!

***

Səbrimin kasəsi doldu gözəlim, bitdi bu iş,

Get deyir ol dəli şeytan, daha yalvarma mənə!

***

Mənim hər bir qəzəlim tək sənə aiddi gülüm,

Yoxdur artıq o qəzəlxan, daha yalvarma mənə!

***

Birtəhər səbr edərik ayrılığın atəşinə,

Bizi yandırsa da hicran, daha yalvarma mənə!

***

Turqayam, mən səni tərk eyləmişəm birdəfəlik,

Vermişəm qəlbimə fərman, daha yalvarma mənə!