Düşüb ayaqlarıma
yalvarma, daha bəsdi,
İlan dili çıxarıb,
yalvarmağın əbəsdi. 

Bəhanə axtarırsan
mənə söyləmək üçün,
Sənin bəhanələrin
çoxdan çəkibdi köçün. 

Döy başını divara,
ağrıyacaq, uf demə.
Tərifləyib özünü
Büllur demə, saf demə. 

Sən çirkaba batmısan,
özün yaxşı bilirsən.
Getdiyin o yolları
peşmanlıqla dönürsən. 

Sonrakı peşmançılıq
kimə fayda veribdir?
Kim nə toxum əkibsə,
ondan bəhər dəribdir. 

Yanıbdı o körpülər,
necə qayıdacaqsan?
Sən qəlbimdən getmişdin,
heçə qayıdacaqsan. 

Yaradana yalvar sən,
O, bəlkə bağışladı.
Sən gedəni mənimçün
başqa həyat başladı.