Kim yazıb bəxtimi, yazan nə yazıb?!
Könlümü talanmı yaşamalıyam?!
Zərrə vüsal verir, o da bir anlıq,
Daima hicranmı yaşamalıyam?!

Sel gəldi, süpürdü sevda bağını,
Yerlə yeksan etdi ülfət dağını.
Ömrümün yazını, gənclik çağını
Fırtına, tufanmı yaşamalıyam?!

Ağ dedi bəxtimi, ağ qara çıxdı,
Sağ dedi canımı, dərd, yara çıxdı,
Bütün əməklərim biyara çıxdı.
Ömrümü yalanmı yaşamalıyam?!