Gəl, gülüm, dərdimi atım, unudum,

Ovcunda su gətir mənə bir qurtum.

Saçını oxşayım, əlindən tutum -

Yatıram, yuxuma qonaq gələrsən!

Ağ atlı oğlanam, nağıl payım ol,

Həzin bir nəğmətək ürəyimə dol.

Bu gecə sübhədək sən yanımda qal -

Yatıram, yuxuma qonaq gələrsən!

Dəli bir istəklə çağlayaq qoşa,

Dayanaq üz-üzə, verək baş-başa.

Eşqimiz dönməsin şaxtalı qışa -

Yatıram, yuxuma qonaq gələrsən!

Vücudun gözümdə incədən, incə

Gələndə sığınma qaranlıq küncə.

Nigaran könlümü qərq et sevincə -

Yatıram, yuxuma qonaq gələrsən!

Yetənin üzünə xoş baxmır həyat,

Sanmayaq eşqimiz boyatdır, boyat!

Seymuru əlinlə silkələ, oyat -

Yatıram, yuxuma qonaq gələrsən!..

MÜƏLLİF:SEYMUR SÖNMƏZ(PAŞAYEV)