Sənə görə həyatımdan bilsən necə öc almışam

Mən ki sənli günlərimi Əzraildən borc almışam

Səni itirdiyim gündən iki yüz il qocalmışam

Cavan yaşda bu canımda dikəlməyə təpər yox

Hansı yönə əl uzatdım, yollarından sapmışdılar

Bilmədim ki, nə sirr idi, bəlkə tilsim yapmışdılar

Balıqları ayırmağın üsulunu tapmışdılar

Elə sərhəd çəkilib ki, aramızda çəpər yox

Unutdura bilmədi heç bu illər də səni mənə

Nə vaxt səndən söz açdımsa, söylədilər dəli mənə

Mən özümə yadlaşınca sən xatırlat məni mənə

Səndən başqa heçliyimi unutduran nəfər yox