Dünyanın sevgi xəritəsi

 

Sənsiz gecələrim gün kimi aydın,

Mənim səhərimin yeri hardadır?

Sevgi xəritəsin sərin qarşıma,

Görüm kədərimin yeri hardadır?

 

Noldu “can” deyib, “can” eşidərdik!

Sevənlər bu qədər yağı olurmu?

Varmı məhəbbətin istiqaməti,

Aşağı, yuxarı, sağı olurmu?

 

Məni sevirsənsə, həsrət nişanı

Açıb ürəyinin xalını göstər.

Ürək də sinədə sol tərəfdədir,

Mənə məhəbbətin solunu göstər.

 

Məni sevirsənsə, qadası, onda

Sənə qovuşmağın yolunu göstər.

Məni sevmirsənsə, qurbanın olum,

Səndən sovuşmağın yolunu göstər.

 

Yoxmudur bu sevgi sənin gözündə?

Tək sən mi gözəlsən bu yer üzündə?

 

Mən heç nə bilmirəm, bildiyim budur;

Baş alıb getdiyim sevgi yoludur.

 

Mən sənin dərdindən ölən bəndəyəm,

Mən sənə baş alıb gələn bəndəyəm.

 

Nə ABŞ, Fransa, nə Britaniya,

Nə İran, Türkiyə, nə Çindən keçir.

Mənim sənə gedən yolum, cığırım,

Elə sənsizliyin içindən keçir...

 

Yusif Nazim Ərəbsoy